Almmustus 2

₁Čále Efesosa searvegotti eŋgelii: Ná cealká son gii doallá olgeš gieđas čieža nástti, ja gii váccaša dan čieža golleginttaljuolggi gaskkas:

₂Mun dieđán du daguid, du rahčama ja du gierdavašvuođa. Mun dieđán ahte don it gierdda bahás olbmuid. Don leat geahččalan daid geat gohčodit iežaset apostalin vaikko eai leat, ja leat gávnnahan sin gielástallin. ₃Don leat maid gierdil, donhan leat gierdan ollu mu nama dihte itge leat váiban.

₄Muhto dán mun in dus dohkket: Don leat hilgon vuosttaš áiggi ráhkisvuođa. ₅Muitte mas leat jorralan, jorgal ja daga fas seammá daguid go álggus. Muhto jos it jorgal, de mun boađán du lusa ja sirddán du ginttaljuolggi eret sajistis. ₆Muhto das don ánssášat rámi ahte vašuhat nikolaoslaččaid daguid, maid maiddái mun vašuhan.

₇Geas leat bealjit, dat gullos maid Vuoigŋa cealká searvegottiide! Dan gii vuoitá, mun attán borrat eallima muoras mii lea Ipmila paradisas.

₈Čále Smyrna searvegotti eŋgelii:

Ná cealká vuosttamuš ja maŋimuš, son gii lei jápmán muhto eallái fas:

₉Mun dieđán du áŧestusa ja geafivuođa – muhto don leat rikkis. Mun dieđán mo du hiddjidit dat geat gohčodit iežaset juvddálažžan vaikko eai leat – Sáhtána synagoga sii leat! ₁₀Ale bala das maid šattat gillát. Beargalat bálkesta dis muhtumiid giddagassii geahččaluvvot, ja logi beaivái dii gártabehtet áŧestussii. Leage oskkáldas gitta jápmima rádjái, de mun attán dutnje eallima vuoitogierddu.

₁₁Geas leat bealjit, dat gullos maid Vuoigŋa cealká searvegottiide! Nubbi jápmin ii eisege vahágahte dan gii vuoitá.

₁₂Čále Pergamona searvegotti eŋgelii:

Ná cealká son geas lea bastilis guovtteávjjot miehkki: ₁₃Mun dieđán gos don ásat: Doppe gos Sáhtána truvdnu lea. Dattetge don doalat čavga mu namas itge leat biehttalan oskumis munnje, it velá daid beivviidge go Antipas, mu oskkáldas duođašteaddji, časkojuvvui jámas din luhtte, doppe gos Sáhtán ássá.

₁₄Muhto mun in dohkket dus visot: Du luhtte leat muhtumat geat dollet gitta Bileama oahpas, su gii oahpahii Balaka čádjidahttit israellaččaid, nu ahte sii borre oaffarbierggu ja furrošedje. ₁₅Du luhtte leat maiddái muhtumat geat dollet gitta nikolaitaid oahpas. ₁₆De jorgal! Muđui mun boađán fargga du lusa ja soađan singuin njálbmán mihkiin.

₁₇Geas leat bealjit, dat gullos maid Vuoigŋa cealká searvegottiide! Dasa gii vuoitá, mun attán čiegus manna borrat ja vilges geađggi, ja geađgái lea čállojuvvon ođđa namma maid ii oktage dovdda earret dan gii dan nama oažžu.

₁₈Čále Tyatira searvegotti eŋgelii:

Ná cealká Ipmila Bárdni gean čalmmit leat dego dollanjuokčamat ja juolggit dego áhcagasti veaiki:

₁₉Mun dieđán du daguid, du ráhkisvuođa, du oskku, du bálvalusa ja du gierdavašvuođa. Du maŋit dagut leat velá eambbo go ovddibut. ₂₀Muhto dan mun in dus dohkket ahte don gierddat dan nissona, Jesabela, gii gohčoda iežas profehtan ja oahpaha ja fille mu bálvaleddjiid furrošit ja borrat oaffarbierggu. ₂₁Mun lean addán sutnje áiggi jorgalit, muhto son ii dáhto hilgut iežas fuorás eallima. ₂₂Dál mun njeaiddán su seaŋggabuorrin, ja buot su fuorráguimmiid mun bijan stuorra áŧestussii, jos sii eai hilggo su daguid. ₂₃Su mánáid mun sorbmen rohttudávddain. Buot searvegottit diehtigohtet ahte mun suokkardan monimuččaid ja váimmuid, ja mun mávssahan juohkehažžii su daguid mielde.

₂₄Muhto eará tyatiralaččaide, didjiide geat ehpet čuovo dan oahpa ehpetge leat dovddiidan dasa maid muhtumat gohčodit Sáhtána čikŋodahkan, mun cealkkán: Mun in bija din guoddit ođđa noađi. ₂₅Dollet čavga das mii dis lea, dassážii go mun boađán.

₂₆Dasa gii vuoitá, dasa gii gitta loahpa rádjái dahká maid mun dáhtun, mun attán fámu ráđđet álbmogiid. ₂₇Son ráđđe daid ruovdesoppiin, cuovku daid dego láirálihtiid. ₂₈Son oažžu seammá fámu go mun lean ožžon Áhčistan; mun attán sutnje guovssonástti.

₂₉Geas leat bealjit, dat gullos maid Vuoigŋa cealká searvegottiide!