Sálmmaid girji 91

₁Dat gii čohkká Alimusa suojis

ja idjada Buotveagalačča suoivanis,

dat dadjá:

₂“Hearrá lea mu báhtaransadji

ja ladni.

Mu Ipmil, dutnje mun dorvvastan.”

₃Son beastá du loddebivdi gielas

ja heavaheaddji rohttudávddas.

₄Son lebbe soajáidis du badjelii,

ja daid vuolde don leat dorvvus.

Su oskkáldasvuohta lea galba ja suodji.

₅It don dárbbaš ballat ija balddáhusain,

it njuolas mii girdá beaivet,

₆it rohttudávddas mii njoammu

seavdnjadin

itge suohtas mii duššada beaiveguovdil.

₇Vaikko duhát olbmo gahčašedje

du bálddas,

logi duháha du olgeš gieđa bealde,

de dat ii ole dutnje.

₈Don beasat oaidnit iežat čalmmiiguin,

mo ipmilmeahttumiidda mávssahuvvo.

₉Du dorvu lea Hearrá,

don leat dahkan Alimusa iežat suodjin.

₁₀Ii mihkkege baháid deaivit du,

ii makkárge lihkuhisvuohta boađe

du goađi lahka.

₁₁Son gohčču eŋgeliiddis várjalit du,

gos ihkinassii don jođát.

₁₂Sii guddet du gieđaideasetguin,

amat nordadit juolggi geađgái.

₁₃Don duolmmat ledjona

ja gearbmaša,

don duolmmastat eatnamii

nuorra ledjona ja guovddi.

₁₄“Son dorvvasta munnje,

ja mun gájun su,

mun attán sutnje suoji,

dasgo son dovdá mu nama.

₁₅Son čuorvu mu,

ja mun vástidan sutnje,

mun lean suinna go son lea heađis,

mun gájun su ja attán sutnje gudni.

₁₆Mun gallehan su guhkes eallimiin,

divttán su oaidnit iežan veahki.”