Sálmmaid girji 73

Duođaid, Ipmil lea buorre Israelii,

daidda geaid váibmu lea buhtis!

₂Mun gosii juo guossalin,

mu juolggit measta njalkkastedje.

₃Mun gáđaštin čeavlás olbmuid,

go oidnen

ahte ipmilmeahttumiidda

geavai bures.

₄Eai sis leat givssit,

sii leat dearvašat ja buoiddit.

₅Eai sis leat makkárge heađit,

eai sii gillá nugo eará olbmot.

₆Dan dihte čeavli lea

sis čeabetčikŋan,

veahkaválddálašvuohta bivttasin.

₇Sin čalmmit báiset

buoidivuođa dihte,

sin váimmu juonain ii leat rádji.

₈Sii hiddjidit ja sárdnot bahávuođain,

stuorra sániiguin sii sordet

vártnuhis olbmo.

₉Sii rabastit njálmmi almmi guvlui,

sin njuovčča manná miehtá eatnama.

₁₀Dan dihte olbmot jorgalit

sin beallái,

njammet sin sániid njálmmi dievva.

₁₁Sii dadjet: “Masbat Ipmil diehtá?

Ii Alimus dieđe maid mii dahkat.”

₁₂Dakkárat leat ipmilmeahttumat,

álo sii leat oadjebasat

ja lasihit rikkisvuođaset.

₁₃Duššiid dihte mun lean bisuhan

váimmu buhtisin

ja bassan gieđaid vigihisvuođas.

₁₄Mun givssiduvvon

geažos beaivvi,

ráŋggáštuvvon juohke iđida.

₁₅Jos mun dajašin:

“Mun dáhtun sárdnut sin láhkái”,

de mun beahtášin du mánáid.

₁₆Mun jurddašadden

vai áddešin dán visot,

muhto dat lei munnje ilá lossat.

₁₇Muhto go mun bohten

Ipmila bassibáikái,

de mun áddejin mo sidjiide

viimmat geavvá.

₁₈Don doalvvut sin

njalkkas geainnuide,

don divttát sin gahččat ja duššat.

₁₉Fáhkkestaga sii duššet,

sin loahppa lea gáfatlaš.

₂₀Go don čuožžilat, Hearrá,

de sii leat dušši,

dego niehku mii jávká

go olmmoš moriha iđđedis.

₂₁Go mu miella lei bahča

ja mu váibmui čuggii,

₂₂dalle mun ledjen jierpmeheapme,

mun ledjen du ovddas

dego dáidemeahttun spire.

₂₃Goittotge mun oaččun leat álo du luhtte,

don leat dohppen mu olgeš gihtii.

₂₄Don láidet mu dáhtot mielde,

ja maŋimustá don alidat mu gudnái.

₂₅Gii mus lea almmis earret du?

Go don leat muinna, de mus ii leat miella

masage eatnama alde.

₂₆Jos velá mu oažži ja mu váibmu

vuoimmehuvvá,

de Ipmil lea agálaččat

mu bákti ja mu oassi.

₂₇Dat geat leat gáidan dus, duššet,

don heavahat buohkaid

geat leat dutnje

oskkáldasmeahttumat.

₂₈Muhto munnje lea buorre

bissut Ipmila lahka.

Mun dorvvastan Hearrái, Ipmilasan,

ja muitalan buot maid son lea dahkan.