Sálmmaid girji 52

₃Manne don goarggastalat

bahávuođainat,

fámolaš olmmái?

Ipmila oskkáldasvuohta bistá

geažos beaivvi.

₄Don smiehtat heavaheami,

du njuovčča lea bahájuonalaš

dego saddjojuvvon niibi.

₅Don ráhkistat bahá buori sajis,

giellásiid ovdal

go duohtavuođa. Sela

₆Don ráhkistat bilideaddji

sárdnuma,

behtolaš njuovčča.

₇Dan dihte Ipmil njeaidá du

agálaš áigái,

dohppe du ja rohtte du

olggos goađistat,

son gaikkiha du luovos

ealli olbmuid eatnamis. Sela

₈Vuoigatlaččat oidnet dan ja ballet,

ja sii boagustit ja dadjet:

₉“Die lea olmmái

gii ii atnán Ipmila suodjinis,

muhto dorvvastii

iežas stuorra riggodahkii,

son anii bahávuođa

gievravuohtanis.”

₁₀Muhto mun lean dego suhkkes

oliivamuorra Ipmila viesus.

Mun dorvvastan

Ipmila oskkáldasvuhtii álo

ja agálaččat.

₁₁Mun giittán du agálaččat

das maid leat dahkan.

Mun bijan doaivvu du nammii

ovttas daiguin geat ballet dus,

dasgo dat lea buorre.