Sátneláskkut 26

₁Nugo muohta geasset,

nugo arvi lájuid áigge,

nu lea gudni jallas olbmui.

₂Dego girddašeaddji cizáš

ja sattáhalli beškkoš

lea ánssáškeahtes garuhus –

ii dat deaivit.

₃Spihčá hestii, suittehat ásenii,

rissi doavkki sealgái!

₄Ale vástit doavkái

su jallavuođa mielde,

amat šaddat su láhkásažžan.

₅Vástit doavkái su jallavuođa mielde,

amas navdit iežas viissisin.

₆Juolggi čuolasta ja vahága bovde

dat gii vuolggaha jalla doalvut sáni.

₇Loažža heaŋgájit lápmása juolggit,

nu maiddái sátnevádjasat jalla njálmmis.

₈Nugo šleŋgui čadnojuvvon geađgi

lea jallii addojuvvon gudni.

₉Dego bastilislátnjáoaksi

gárrenolbmo gieđas

lea sátnevájas jalla njálmmis.

₁₀Dego báhčči gii hávváduhttá summal,

lea dat gii bálkáha

jalla dahje meaddelmanni.

₁₁Dego beana mii máhccá

vuovssanasaidasas,

lea jalla gii geardu jallavuođaidis.

₁₂Jos oainnát olbmá

gii lea viissis iežas čalmmiin –

eambbo doaivu lea jallii go sutnje.

₁₃Láiki dadjá:

“Geainnus lea spire,

ledjon gasku gáhta!”

₁₄Uksa jorrá gižaldagas,

láikkan fierada seaŋggastis.

₁₅Láiki nahkeha gieđa gárrái,

njálmmi rádjái giehta ii badján.

₁₆Láiki navdá iežas viisábun

go čiehčasa

geat vástidit jierpmálaččat.

₁₇Golgobeatnaga beljiide dohppe dat

gii suhttiha go earát bealkkašit.

₁₈Dego mielaheapme gii báhčá

buolli ja goddi njuolaid,

₁₉lea dat gii beahttá ustibis

ja de dadjá:

Munhan dušše leaikkastallen!

₂₀Go muorat leat nohkan,

de dolla jáddá,

go šláttardeaddji lea mannan,

de jaskkoda bealku.

₂₁Činat áššui, muorat dollii,

bealkálas olmmái cahkkeha riiddu.

₂₂Sealggebealsárdnu ságat leat

dego herskot,

dat vudjot olbmo siskkildassii.

₂₃Dego silbageardi láirálihtis

leat njálggisteaddji baksamat

ja bahás váibmu.

₂₄Vaššás olmmoš guoktiluššá

baksamiiddisguin,

muhto siskkildasas

sus lea beahtus.

₂₅Son dahká jienas linisin,

muhto ale jáhke sutnje,

su váimmus leat čieža fastivuođa.

₂₆Son čiehká vašis juonalašvuođain,

muhto čoakkalmasas

su bahávuohta boahtá albma.

₂₇Dat gii roggá hávddi, gahččá dasa ieš,

gii fieraha geađggi,

dan ala dat fierrala.

₂₈Gielástalli vašuha daid

geaid vahágahttá,

njálggástalli ráhkada heavu.