Levilaččaid gávpogat
1Levilaččaid bearašoaivámuččat bohte Kanaana Šiloi báhppa Elasara ja Josua, Nuna bártni, ja Israela eará čearddaid bearašoaivámuččaid ságaide 2ja dadje sidjiide: “Hearrá gohčui Mosesa bokte ahte midjiide galget addojuvvot gávpogat ássanbáikin ja guohtuneatnamat min omiid várás.” 3Israellaččat adde iežaset guovlluin levilaččaide gávpogiid oktan daid guohtuneatnamiiguin, nugo Hearrá lei gohččon. 4Vuorbádeamis vuosttaš vuorbi gahčai kehatlaččaid sogaide. Daidda levilaččaide geat nállašuvve báhppa Aronis, vuorbáduvvojedje golbmanuppelohkái gávpoga Juda, Simeona ja Benjamina čearddaid guovlluin. 5Eará kehatlaččaid sogaide vuorbáduvvojedje logi gávpoga Efraima ja Dana čearddaid ja Manasse čeardabeale guovlluin. 6Geršonlaččaid sogaide vuorbáduvvojedje golbmanuppelohkái gávpoga Isaskara, Ašera ja Naftali čearddaid guovlluin ja Manasse čeardabeale guovllus Bašanis. 7Merarilaččaid sogaide vuorbáduvvojedje guoktenuppelohkái gávpoga Rubena, Gada ja Sebulona čearddaid guovlluin. 8Daid gávpogiid ja guohtuneatnamiid daid birra israellaččat vuorbádedje levilaččaide, nugo Hearrá lei gohččon Mosesa bokte.
9Juda ja Simeona čearddaid guovlluin addojuvvojedje čuovvovaš gávpogat. 10Dat addojuvvojedje daidda levilaččaide geat leat Arona bártni Kehata nális, dasgo vuosttaš vuorbi gahčai sidjiide. 11Sidjiide addojuvvui Juda várreeatnamis anaklaččaid máttu Arba gávpot Kirjat-Arba dahjege Hebron oktan guohtuneatnamiinnis. 12Gávpoga bealddut ja birasbáikkit ledje addojuvvon opmodahkan Kalebii, Jefunne bárdnái. 13Báhppa Arona nállái addojuvvojedje Juda ja Simeona čearddaid guovlluin nappo Hebron, dorvogávpot, Libna, 14Jattir, Eštemoa, 15Holon, Debir, 16Ašan, Bet-Šemeš, ovcci gávpoga oktan guohtuneatnamiiddisetguin. 17Benjamina čeardda guovllus sidjiide addojuvvojedje Gibeon, Geba, 18Anatot ja Almon, njeallje gávpoga oktan guohtuneatnamiiddisetguin. 19Arona soga báhpain ledje buohkanassii golbmanuppelohkái gávpoga oktan guohtuneatnamiiddisetguin.
20Eará kehatlaččaid sogaid levilaččat ožžo vuorbádemiin gávpogiid Efraima čeardda guovllus. 21Efraima várreeatnamis sidjiide addojuvvojedje Sikem, dorvogávpot, Geser, 22Kibsajim ja Bet-Horon, njeallje gávpoga oktan guohtuneatnamiiddisetguin. 23Dana čeardda guovllus sidjiide addojuvvojedje Elteke, Gibbeton, 24Ajalon ja Gat-Rimmon, njeallje gávpoga oktan guohtuneatnamiiddisetguin. 25Manasse čeardabeale guovllus sidjiide addojuvvojedje Taanak ja Jibleam, guokte gávpoga oktan guohtuneatnamiiddisetguin. 26Dát kehatlaččaid sogat ožžo oktiibuot logi gávpoga oktan guohtuneatnamiiddisetguin.
27Daidda levilaččaid sogaide mat nállašuvvet Geršonis, addojuvvojedje Manasse čeardabeale guovllus Bašanis Golan, dorvogávpot, ja Aštarot, guokte gávpoga oktan guohtuneatnamiiddisetguin. 28Isaskara čeardda guovllus sidjiide addojuvvojedje Kišon, Daberat, 29Jarmut ja En-Gannim, njeallje gávpoga oktan guohtuneatnamiiddisetguin. 30Ašera čeardda guovllus sidjiide addojuvvojedje Mišal, Abdon, 31Helkat ja Rehob, njeallje gávpoga oktan guohtuneatnamiiddisetguin. 32Naftali čeardda guovllus sidjiide addojuvvojedje Galileas Kedeš, dorvogávpot, Hammot-Dor ja Kartan, golbma gávpoga oktan guohtuneatnamiiddisetguin. 33Geršonlaččaid sogaide addojuvvojedje oktiibuot golbmanuppelohkái gávpoga oktan guohtuneatnamiiddisetguin.
34Daidda levilaččaide geat nállašuvvet Meraris, addojuvvojedje Sebulona čeardda guovllus Jokneam, Karta, 35Rimmona ja Nahalal, njeallje gávpoga oktan guohtuneatnamiiddisetguin. 36Jordana don bealde, Jeriko nuorttabealde, sidjiide addojuvvojedje Rubena čeardda guovllus Beser, dorvogávpot, mii lei alážis meahcis, Jahas, 37Kedemot ja Mefaat, njeallje gávpoga oktan guohtuneatnamiiddisetguin. 38Gada čeardda guovllus Gileadis sidjiide addojuvvojedje Ramot, dorvogávpot, Mahanajim, 39Hešbon ja Jaser, njeallje gávpoga oktan guohtuneatnamiiddisetguin. 40Oktiibuot merarilaččaid sogat ožžo vuorbádemiin guoktenuppelohkái gávpoga. 41Buot levilaččat ožžo Israela čearddaid guovlluin oktiibuot njealljelogigávcci gávpoga oktan guohtuneatnamiiddisetguin. 42Guđege gávpogii gulle guohtuneatnamat mat ledje dan birra.
43Ná Hearrá attii israellaččaide oppa dan eatnama maid son lei váliin lohpidan sin áhčiide áigut addit, ja sii válde eatnama ja ásse dohko. 44Hearrá divttii sin eallit ráfis juohke sajis, nugo son lei vurdnon sin áhčiide. Ii oktage sin vašálaččain bihtán sis, muhto Hearrá attii daid buohkaid sin gihtii. 45Ii mihkkege buot dain buriin maid Hearrá lei lohpidan Israela álbmogii, šaddan duššin. Buot lohpádusat ollašuvve.
