Job 20

₂Mun lean nu hárbman

ahte ferten vástidit,

mu hirpmástupmi bágge mu dasa.

₃Mun šattan gullat

heahppášuhtti cuiggodusa,

muhto mu áddejupmi

addá munnje vástádusa.

₄Donhan dieđát: Dološ áiggiid rájes,

gitta dan rájes go olbmot

leat leamaš eatnama alde,

de sii leat diehtán

₅ ahte ipmilmeahttumiid ávvu

lea oanehaš,

bahás olbmo illu bistá

dušše čalbmeravkalanbottu.

₆Vaikko son šattašii gitta almmi rádjái,

vaikko su oaivi guoskkašii balvvaide,

₇de son dattetge luottahuvvá

dego iežas baika.

Dat geat oidne su, jerret: “Gosa son šattai?”

₈Dego niehku son girdá eret iige leat šat,

son jávká dego idjaoainnáhus.

₉Dat geat oidne su, eai oainne su šat,

su ássansadji ii šat deaivvat suinna.

₁₀Su bártnit fertejit addit

buhtadusa heajuide,

su mánát šaddet máhcahit su riggodaga.

₁₁Vaikko su rupmaša dievva lei

nuorravuođa fápmu,

de dat biddjojuvvo suinna muldii.

₁₂Jos bahá njálggiida su njálbmái,

ja son čiehká dan njuokčamis vuollái,

₁₃seastá dan iige luoitte,

muhto doallá dan guomi vuostá,

₁₄de dat nuppástuvvá

go son lea dan njiellan,

dat šaddá gearbmašmirkon su čoavjjis.

₁₅Son ferte fas vuoksit

riggodaga maid njielai,

Ipmil vuojiha dan olggos su čoavjjis.

₁₆Gearbmašmirkko son njamai,

mirkogearbmaša njuovčča goddá su.

₁₇Son ii goassege beasa oaidnit jogaid,

ii eanuid main golgá honnet ja lákca.

₁₈Ii son beasa návddašit dan

maid lei fidnen,

su stuorra vuoittut eai šatta sutnje illun,

₁₉danin go son cuvkii heajuid

ja guđii sin veallát,

ja lea rievidan alccesis viesuid

maid earát leat huksen.

₂₀Go son anistumistis ii oaččo doarvái,

de son ii goassege veaje gádjut

dan mii sutnje lea mávssolaš.

₂₁Ii oktage vealtan su vuovdáivuođas,

danne su lihkku ii bistte.

₂₂Stuorra valljugasvuođastis

son šaddá baskkádassii,

lihkuhisvuohta deaivida su olles fámuin.

₂₃Son oažžu eambbo go doarvái:

Ipmil vuolggaha buolli moaris su vuostá

ja arvviha heavahusa su ala.

₂₄Jos son beassá báhtarit

ruovdevearjjuin,

de su ráigá bronsanjuolla.

₂₅Son geassá njuola sealggistis,

dan šealgu njuni sáhpperáhkustis,

ja son suorgana.

₂₆Sus lea aivve seavdnjadas vuordagis,

su loaktá dolla mii lea su várás

cahkkehuvvon.

Ii oktage su goađis beasa báhtarussii.

₂₇Albmi almmuha su rihkkosa,

eanan čuožžila su vuostá.

₂₈Eatnu doalvu su viesu,

dulvi doidá dan eret Ipmila moari beaivvi.

₂₉Dát lea ipmilmeahttuma oassi

maid son oažžu Ipmilis,

árbi maid Ipmil lea mearridan sutnje.