Job 2

₁Muhtun beaivvi ipmiliid bártnit bohte fas čoahkkái ja loaiddastedje Hearrá ovdii. Maiddái Sáhtán lei sin gaskkas. ₂Hearrá jearai Sáhtánis: “Gos don boađát?” Sáhtán vástidii: “Vádjoleames ruossut doarrás miehtá eatnama.” ₃Hearrá jearai sus: “Leatgo mearkkašan mu bálvaleaddji Joba? Su lágáš ii leat eatnama alde. Son lea láitemeahttun ja vuoigatlaš olmmái, son ballá Ipmilis ja fasttáša buot bahá. Son bissu ain láitemeahttumin, vaikko don vikkahit mu heavahit su almmá siva haga.” ₄Sáhtán vástidii: “Liiki liikkis! Olmmoš addá buot mii sus lea, go fal beassá suodjalit iežas. ₅Muhto geigemat gieđa ja guoskka su rupmašii, de son garuha du čalbmehálgui.” ₆Hearrá celkkii Sáhtánii: “Son lea du gieđas, duššefal seastte su heakka.”

₇Nu Sáhtán vulggii Hearrá luhtte. Son časkkii Jobii bahás buhkkuid juolgevuođu rájes gitta oaivečohka rádjái. ₈Job čohkánii gutnaduvdnái ja faskkui rupmaša láirálihttebihtáin. ₉Su áhkká dajai sutnje: “Bisutgo don ain láitemeahttumin? Garut Ipmila ja jáme!” ₁₀Job vástidii: “Don sártnut dego jalla. Mii váldit Ipmila gieđas buriid, eatgo de válddáše baháidge?” Buot dás Job ii suddudan sániinge.

₁₁Jobis ledje golbma ustiba; temanlaš Elifas, šuahlaš Bildad ja naamalaš Sofar. Go sii gulle buot lihkuhisvuođa mii lei deaividan Joba, de sii bohte čoahkkái, iešguhtege ruovttubáikkistis, ja árvaledje vuolgit Joba lusa árpmoštit ja jeđđet su. ₁₂Sii oidne su juo guhkkin, muhto eai dovdán su. Sii čirrojedje, gaikkodedje oalgebiktasiiddiset ja botkkuhedje muoldda vuovttaide. ₁₃De sii čohkánedje eatnamii su báldii ja čohkkájedje das čieža beaivvi ja čieža ija. Ii oktage dadjan Jobii sánige, dasgo sii oidne ahte su bávččas lei hui stuoris.