Job 18

₂Goas don áiggut bidjat ráji sániidasat?

Jierpma, de mii sáhttit sártnodit!

₃Anátgo don min šibihin,

leatgo mii du čalmmiin doavkkit?

₄Du iežat moarri gaikkoda du.

Galggašiigo eanan šaddat ávdimin du dihte

ja bákti sirdásit sajistis?

₅Goittotge ipmilmeahttuma čuovga čáská,

su dola njuokčamat eai báitte.

₆Su goađi čuovga sevnnjoda,

su lámpá jáddá.

₇Su fámolaš lávkkit árrojit,

su iežas áigumušat njeidet su.

₈Su juolggit sorrojit fierbmái,

son gahččá bivdoroggái.

₉Su juolgi darvána gillii,

báddi doallá su gitta.

₁₀Fierbmi lea čihkkojuvvon eatnamii,

su bálgá alde lea giella.

₁₁Suorggahusat balddihit su

juohke guovllus,

dat doarridit su ja faŋuhit su julggiid.

₁₂Heavvu dáhttu njiellat su,

lihkohisvuohta čuožžu gárvvisin

su bálddas.

₁₃Dávda borrá su liikki,

jápmima vuosttašriegádeaddji

loaktá su lahtuid.

₁₄Son gaikojuvvo goađistis, iežas dorvvus,

ja dolvojuvvo balddáhusaid gonagasa lusa.

₁₅Su goahtái ássá ballu,

rišša botkkuhuvvo su ássanbáikki miehtá.

₁₆Vuollin eatnamis su ruohttasat goiket,

badjin su oavssit ástet.

₁₇Su muitu jávká eatnamis,

su namma ii šat beakke gáhtain ja šiljuin.

₁₈Son norddastuvvo

čuovgasis seavdnjadassii,

son áddjojuvvo eret eatnama alde.

₁₉Sutnje ii báze nálli

iige árbbolaš iežas álbmogii,

ii oktage báze eallit su vissui.

₂₀Dat geat ásset oarjin, soiget su oasi,

nuortan olbmát dohppehallet ballui.

₂₁Ná geavvá suttolačča ássansadjái,

dan olbmo vissui gii ii dovdda Ipmila.