1. Mosesgirji 17
Lihttu ja lihtu mearka
1Go Abram lei ovccilogiovccijahkásaš, de Hearrá almmustuvai sutnje ja celkkii: “Mun lean Ipmil, Buotveagalaš. Vádjol láitemeahttumin mu muođuid ovddas. 2Mun dagan lihtu duinna ja dagan du náli sakka stuorisin.” 3Dalle Abram luoitádii eatnamii muđolassii, ja Ipmil celkkii sutnje: 4“Dát lea lihttu maid mun dagan duinna: Don šattat eatnat álbmogiid áhččin. 5Du namma ii leat šat Abram, muhto Abraham, danne go mun dagan du álbmogiid eatnatvuođa áhččin. 6Mun dagan du hui šattolažžan, ja dus buolvaduvvet álbmogat ja gonagasat. 7Mun bisuhan lihtton duinna ja du náliin, agálaš lihtu buolvvas bulvii, ja mun lean du Ipmil ja maiddái du náli Ipmil. 8Mun attán dutnje ja du nállái dán eatnama agálaš opmodahkan, oppa Kanaana gos don dál ásat vierisin, ja mun lean maiddái du náli Ipmil.”
9Ipmil celkkii vel Abrahamii: “Dollet mu lihtu, don ja du nálli buolvvas bulvii. 10Dán dii galgabehtet doallat dan lihtus maid mun lean dahkan duinna ja du náliin: Birračuhppet juohke olbmábeali. 11Čuhppet eret iežadet ovdaliikki. Dát lea dan lihtu mearka maid mun lean dahkan dinguin. 12Buot din olbmábealli galgá birračuhppojuvvot gávccibeaivásažžan buolvvas bulvii, maiddái šlávat geat leat riegádan du viesus ja šlávat geaid leat oastán vierroeatnama olbmuin, dakkárat geat eai gula du nállái. 13Sii galget birračuhppojuvvot, sihke šlávat geat leat riegádan du viesus ja šlávat geaid don leat oastán. Nu din oačči birračuohpahus lea mu agálaš lihtu mearkan. 14Muhto juohke birračuohpakeahtes olbmábealli gean ovdaliiki ii leat birračuhppojuvvon, galgá čuldojuvvot álbmogisttis. Dasgo son lea rihkkon mu lihtu.”
15Ipmil celkkii Abrahamii: “Ale gohčot šat áhkát Sarajin, muhto gohčo su Saran. 16Mun buressivdnidan su ja divttán su riegádahttit dutnje bártni. Mun buressivdnidan su: Sus buolvaduvvet álbmogat ja gonagasat.” 17Abraham luoitádii eatnamii muđolassii muhto bohkosii, danin go son jurddašii: “Sáhttágo čuođijahkásaš šaddat áhččin, ja sáhtášiigo Sara gii lea ovccilogijahkásaš, vel riegádahttit?” 18Ja Abraham celkkii Ipmilii: “Vare Ismael beasašii eallit du ovddas!” 19Ipmil celkkii: “Du áhkká Sara riegádahttá dutnje bártni, ja don galggat bidjat su namman Isak. Mun bisuhan lihtton suinna, ja dat bissu agálaččat maiddái su náliin. 20Ja mun lean gullan maiddái du rohkadusa Ismaela ovddas. Mun buressivdnidan su, dagan su šattolažžan ja eatnánahtán su hui sakka. Son šaddá guoktenuppelohkái oaivámučča áhččin, ja mun dagan su stuorra álbmogin. 21Muhto lihtton mun bisuhan Isakiin gean Sara riegádahttá boahtte jagi dán áigái.” 22Go Ipmil lei sárdnon Abrahamiin, de son vulggii eret su luhtte.
23Seammá beaivvi Abraham birračuohpai bártnis Ismaela ja iežas viesu olbmáid ja bárdnemánáid, sihke daid geat ledje riegádan su viesus ja daid geaid lei oastán ruđain, nugo Ipmil lei gohččon su dahkat. 24Abraham lei ovccilogiovccijahkásaš go su ovdaliiki čuhppojuvvui, 25ja su bárdni Ismael lei golbmanuppelotjahkásaš go su ovdaliiki čuhppojuvvui. 26Dan seammá beaivvi birračuhppojuvvuiga Abraham ja su bárdni Ismael. 27Buot Abrahama viesu olbmát, sihke dat geat ledje riegádan su viesus ja dat geaid son lei oastán vierroeatnama olbmuin, birračuhppojuvvojedje oktan suinna.
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019