Belšassara guossemállásat
1Gonagas Belšassar doalai stuorra guossemállásiid duhát stuorrásis ja jugai viinni ovttas singuin. 2Go Belšassar lei gárihuvvan, de son gohčui viežžat daid golle- ja silbalihtiid maid su áhčči Nebukadnesar lei váldán Jerusalema tempelis, vai son ieš ja su stuorrát, su áhkát ja su liigeáhkát beasašedje juhkat dain. 3Dalle buktojuvvojedje golle- ja silbalihtit mat ledje váldojuvvon Jerusalema tempelis, ja gonagas ja su stuorrát, su áhkát ja su liigeáhkát juhke dain. 4Sii juhke viinni ja máidno iežaset golle-, silba-, veaike-, ruovde-, muorra- ja geađgeipmiliid.
5Fáhkkestaga ihte olbmogieđa suorpmat, ja dat čálligohte gonagasa šloahta kálkejuvvon seaidnái, lámpájuolggi báldii. Gonagas oinnii gieđa mii čálii. 6Dalle son šovkkodii, ja su jurdagat suorggahedje su. Son njuorai áibbas, ja su čippit doarggistedje. 7Alla jienain gonagas gohčui viežžat mánideddjiid, nástečilgejeddjiid ja mearkačilgejeddjiid. Son sártnui Babylona viisáide: “Dasa gii máhttá lohkat dán čállosa ja čilget dan munnje, gárvvuhuvvo purpur, son oažžu golleviđjji čeabehii ja šaddá dán riikka goalmmádin fámoleamos olmmájin.” 8Buot gonagasa viisát bohte dohko, muhto sii eai máhttán lohkat čállosa eaige čilget dan gonagassii. 9Dalle gonagas Belšassar gáfestuvai ja šovkkodii, ja su stuorrát vuorrástuvve.
10Leaskadronnet, gii lei gullan gonagasa ja su stuorráid ságaid, bođii feastasálii ja dajai: “Ellos gonagas agálaččat! Ale suorgan alege šovkkot! 11Du riikkas lea olmmái gean siste lea bassi ipmiliid vuoigŋa. Áhčát beivviid sus gávnnahuvvui leat erenoamáš ipmárdus ja ipmiliid viisodat. Du áhčči, gonagas Nebukadnesar, dagai su einnosteddjiid, mánideddjiid, nástečilgejeddjiid ja mearkačilgejeddjiid njunušin. 12Danielis, gean gonagas gohčui Beltešassarin, lea erenoamáš vuoigŋa, jierbmi ja ipmárdus, ja son máhttá čilget nieguid, árvidit árvádusaid ja čoavdit váttis čuolmmaid. Vieččat dál Daniela, de son addá dutnje čilgehusa!” 13Daniel vižžojuvvui gonagasa ovdii, ja gonagas dajai sutnje: “Don nappo leat Daniel, okta dain Judas eret dolvojuvvon olbmuin geaid mu áhčči, gonagas, buvttii deike? 14Mun lean gullan ahte du siste lea ipmiliid vuoigŋa ja ahte don leat čájehan stuorra ipmárdusa ja erenoamáš viisodaga. 15Dál leat viisát ja mánideaddjit vižžojuvvon mu ovdii vai sii logašedje dán čállosa ja čilgešedje dan munnje, muhto sii eai máhte dahkat dan. 16Mun lean gullan ahte don máhtát čilget nieguid ja čoavdit váttis čuolmmaid. Jos don dál máhtát lohkat dán čállosa ja muitalit munnje dan čilgehusa, de dutnje gárvvuhuvvo purpur, don oaččut golleviđjji čeabehii ja šattat dán riikka goalmmádin fámoleamos olmmájin.”
17Dalle Daniel vástidii gonagassii: “Ane attáldagaidat alddát ja atte bálkkašumiidat earáide. Dán čállosa mun almmatge logan dutnje ja muitalan dan čilgehusa. 18Gonagas, gula mu! Alimus Ipmil attii áhččásat Nebukadnesarii riikka ja fámu, gudni ja hearvásvuođa. 19Dan stuorisvuođa geažil maid son lei ožžon Ipmilis, de buot álbmogiid, čearddaid ja gielaid olbmot doarggistedje balus su ovddas. Son gottii gean dáhtui, divttii eallit gean dáhtui, alidii gean dáhtui ja vuolidii gean dáhtui. 20Muhto go son čeavllui ja šattai gážžárin ja heabuheapmin, de son norddastuvvui vuolás gonagastruvnnustis, ja su gudni váldojuvvui sus eret. 21Son áddjojuvvui eret olbmuid luhtte, su váibmu nuppástuvai ja šattai elliid váimmu láhkásažžan, son orui meahcceáseniid gaskkas ja borai rásiid dego vuovssát, ja almmi suoldni láktadii su rupmaša, dassážii go son dovddiidii ahte alimus Ipmil ráđđe olbmuid riikkaid ja addá daid geasa dáhttu. 22Muhto don, Belšassar, gii leat su bárdni, it leat vuollánan, vaikko dieđát buot dán. 23Don leat alidan iežat Almmi Hearrá vuostá ja leat vieččahan su tempela lihtiid. Don ieš ja du stuorrát, du áhkát ja du liigeáhkát lehpet juhkan dain viinni ja máidnon ipmiliiddádet mat leat ráhkaduvvon silbbas ja gollis, veaikkis ja ruovddis, muoras ja geađggis, ipmiliid mat eai oainne, eai gula eaige dieđe maidege. Muhto don it leat gudnejahttán dan Ipmila gean gieđas lea du heagga ja du vuorbi. 24Danin son vuolggahii gieđa čállit dán čállosa. 25Ja dát lea čálus mii lea čállojuvvon seaidnái: Mene mene tekel u-farsin. 26Ja dát lea dan čilgehus: ‘Mene’ – Ipmil lea lohkan du gonagasvuođa beivviid ja loahpaha daid. 27‘Tekel’ – don leat vihkkejuvvon viehkagiin ja gávnnahuvvon beare geahpasin. 28‘Peres’ – du riika juogaduvvo ja addojuvvo medialaččaide ja persialaččaide.”
29Dalle Belšassar gohčui gárvvuhit Danielii purpura, heaŋggastit golleviđjji su čeabehii ja gulahit ahte son šaddá riikka goalmmádin fámoleamos olmmájin. 30Dan seammá ija goddojuvvui Belšassar, kaldealaččaid gonagas.
