Apostaliid dagut 5

₁Muhtun olmmái gean namma lei Ananias, ja su áhkká Safira vuvddiiga opmodaga. ₂Olmmái doalai alccesis oasi hattis, ja su áhkká diđii dan. Loahpa hattis son buvttii apostaliidda. ₃Dalle Peter dajai: “Ananias, manne Sáhtán lea deavdán du váimmu, go don behttet Bassi Vuoiŋŋa ja čihket oasi dan ruđas maid ožžot bealddus? ₄Almma opmodat lei du ovdal go don dan vuvdet? Du ledje maiddái ruđat maid dan vuovdimis ožžot. Mo sáhttet don váimmustat jurddašit dahkat ná? It don leat gielástallan olbmuid, muhto Ipmila.” ₅Go Ananias gulai daid sániid, de son gahčai eatnamii ja jámii. Buohkat geat dan gulle, šadde ballui. ₆Nuorra olbmát gisse Ananiasa rupmaša liinniin, gudde su olggos ja hávdádedje su.

₇Lahka golmma diimmu maŋŋil bođii dasa Ananiasa áhkká iige son diehtán mii lei dáhpáhuvvan. ₈Peter jearai sus: “Muital munnje, dágo lei buot maid doai oaččuide bealddu ovddas?” Nisson vástidii: “Lei, die lei buot.” ₉Dalle Peter dajai: “Manne doai ovttasráđiid leahppi geahččalan Hearrá Vuoiŋŋa? Almma don gulat lávkkiid uvssa duohken? Dat geat hávdádedje du boatnjá, guddet dáppe olggos maiddái du.” ₁₀Dallánaga nisson gahčai Petera julggiid ovdii ja attii vuoiŋŋas. Nuorra olbmát bohte sisa ja oidne ahte nisson lei jápmán. Sii gudde su olggos ja hávdádedje su boatnjás báldii. ₁₁Oppa searvegoddi ja buohkat geat dan gulle, dohppehalle stuorra ballui.

₁₂Apostaliid gieđaid bokte dáhpáhuvve eatnat mearkkat ja oavdudagut olbmuid gaskkas. Buot oskkolaččat bisso ovttamielalažžan ja lávejedje čoagganit Salomo geađgestoalpohállii ₁₃Ii oktage eará duostan searvat sidjiide. Olbmot atne sin alla árvvus, ₁₄ja eanet ahte eanet lassánii daid olbmáid ja nissoniid lohku geat osko Hearrái. ₁₅Olbmot gudde buhcciid gáhtaide ja bidje sin veallát seaŋggaide ja guoddinmuoraid ala, vai Petera suoivva deaivvašii sin go son váccii meattá. ₁₆Maiddái Jerusalema birasgávpogiin bohte ollu olbmot ja bukte mielddiset buhcciid ja daid geaid buhtismeahttun vuoiŋŋat váivvidedje, ja sii buohkat šadde dearvvašin.

₁₇Dalle moaráhuvai bajimusbáhppa ja dat geat dolle su beali, namalassii saddukealaččaid searvi. ₁₈Sii válde apostaliid gitta ja bidje sin giddagassii. ₁₉Muhto ihkku Hearrá eŋgel rabastii giddagasa uvssaid, doalvvui sin olggos ja celkkii: ₂₀“Mannet tempelii ja sárdnot álbmogii buot eallima sániid.” ₂₁Go sii gulle dan, de sii manne tempelii go beaivi čuvggodii ja oahpahedje olbmuid.

Bajimusbáhppa ja su lagamus olbmát rávke čoahkkái ráđi, buot Israela vuorrasiid, ja vieččahedje apostaliid giddagasas. ₂₂Muhto go bálvaleaddjit bohte dohko, de sii eai gávdnan sin. Sii máhcce ja muitaledje: ₂₃“Mii oinniimet ahte giddagas lei fuolalaččat lohkkaduvvon ja fávttat ledje čuožžumin uvssaid ovddas, muhto go rabaimet uvssaid, de mii eat gávdnan doppe ovttage.” ₂₄Go tempelfávttaid hoavda ja bajimusbáhpat dan gulle, de sii ráđehuvve eaige ipmirdan mii lei dáhpáhuvvan. ₂₅Dalle bođii muhtun muitalit: “Dat olbmát geaid dii bijaidet giddagassii, čužžot dál tempelis ja oahpahit olbmuid.” ₂₆Tempelfávttaid hoavda vulggii bálvváidisguin viežžat sin ja buvttii sin dasa. Sii eai atnán veahkaválddi, dasgo sii balle ahte olbmot geađgádit sin.

₂₇Apostalat buktojuvvojedje ráđi ovdii, ja bajimusbáhppa gažadišgođii sin. Son dajai: ₂₈“Mii gilddiimet din garrasit oahpaheames dan olbmá nammii. Muhto dattetge dii lehpet deavdán oppa Jerusalema oahpuineattet ja áigubehtet dahkat min sivalažžan dan olbmá jápmimii.” ₂₉Dasa Peter ja eará apostalat vástidedje: “Olmmoš galgá jeagadit Ipmila eambbo go olbmuid. ₃₀Min áhčiid Ipmil lea čuoččáldahttán jábmiid luhtte Jesusa gean dii heŋgiidet ruossamurrii ja gottiidet. ₃₁Su lea Ipmil alidan olgeš gieđainis oaivámužžan ja Beastin, vai Israel máhttá jorgalit ja oažžut suttuidis ándagassii. ₃₂Mii leat buot dan duođašteaddjit, ja maiddái Bassi Vuoigŋa gean Ipmil lea addán daidda geat su jeagadit.”

₃₃Go sii dán gulle, de sii moaráskedje ja árvaledje goddit sin. ₃₄De Gamaliel, muhtun farisealaš láhkaoahpaheaddji gean oppa álbmot anii alla árvvus, čuožžilii Ráđis ja gohččui sin doalvut olbmáid olggos oanehis boddui. ₃₅Son dasto dajai: “Israellaččat, smihttet dárkilit ovdal go dahkabehtet maidege dáidda olbmáide. ₃₆Dáid beivviid ovdal čuožžilii Teudas. Son anii iežas stuorra olmmájin, ja su čuovvuledje sullii njeallječuođi olbmá, muhto son goddojuvvui ja buot su doarjaleaddjit bieđganedje ja jávke. ₃₇Su maŋŋá čuožžilii olmmošlohkui čáliheame áigge galilealaš Judas gii gesii ollu olbmuid beallásis, muhto songe goddojuvvui ja buot su doarjaleaddjit bieđganedje. ₃₈Ja dál mun cealkkán didjiide: Diktet dáid olbmáid orrut, luitet sin mannat. Jos dát lea olbmo dáhttu ja dahku, de dat duššá. ₃₉Muhto jos dat boahtá Ipmilis, de dii ehpet sáhte dan duššadit. Váruhehket, amadet gávnnahallat soahtamin Ipmila vuostá.”

Sii jeagadedje Gamaliela. ₄₀Sii rávke apostaliid sisa, spihččehedje sin ja gilde sin sárdnumis Jesusa nammii, muhto luite sin mannat. ₄₁Apostalat vulge ráđi ovddas ilus, go ledje adnojuvvon dohkálažžan gillát hiddjádusa Jesusa nama dihte. ₄₂Sii eai heaitán oahpaheames beaivválaččat tempelis ja ruovttuin eaige sárdnideames ahte Jesus lea Messias.