2. Gonagasaid girji 22

₁Jošia lei gávccijahkásaš go šattai gonagassan, ja son ráđđii Jerusalemis golbmalogiokta jagi. Su eadni lei boskatlaš Jedida, Adaja nieida. ₂Son dagai dan mii lea riekta Hearrá čalmmiin. Son vádjolii ollásit áhčis Davida geainnu iige spiehkastan das ii olgeš iige gurut beallái.

₃Gávccinuppelogát ráđđenjagistis gonagas Jošia vuolggahii Hearrá tempelii čálli Šafana, Mešullama bártni Asalja bárdni. Son dajai: ₄“Mana bajimusbáhppa Hilkia lusa ja gohčo su čohkket ruđaid mat leat buktojuvvon Hearrá tempelii, buot ruđaid maid uksafávttat leat čoaggán álbmogis. ₅Son galgá addit ruđaid hoavddaide geat gozihit Hearrá tempela divodanbargguid. Sii galget máksit ruđain bargiide geat leat divvumin Hearrá tempelis dan mii lea billašuvvan. ₆Dain galgá máksit snihkkáriid, huksejeddjiid ja muvrráriid bálkká, ja ruđain galgá maid háhkat muora ja čullojuvvon geđggiid tempela divvumii. ₇Allet gáibit sis čilgehusa dain ruđain mat sidjiide leat oskkilduvvon, dasgo sidjiide sáhttá luohttit.”

₈Bajimusbáhppa Hilkia dajai čálli Šafanii: “Mun gávdnen Hearrá tempelis láhkagirjji.” Hilkia attii girjji Šafanii, ja son logai dan. ₉Dasto čálli Šafan máhcai gonagasa lusa ja muitalii sutnje: “Du bálvaleaddjit leat váldán ruđaid mat tempelis ledje, ja addán daid hoavddaide geat gozihit bargguid Hearrá tempelis.” ₁₀Čálli Šafan muitalii vel gonagassii ahte báhppa Hilkia lei addán sutnje girjji. Son logai dan gonagassii. ₁₁Go gonagas gulai láhkagirjji sániid, de son gaikkodii biktasiiddis. ₁₂Son dajai báhppa Hilkiai ja Šafana bárdnái Ahikamii, Mikaja bárdnái Akborii, čálli Šafanii ja hoavvaolbmásis Asajai: ₁₃“Mannet jearrat Hearrás maid mii galgat dahkat, go dát girji lea gávdnon. Jerret dan mu ja mu álbmoga beales, jerret oppa Juda beales. Hearrá moarri lea stuoris; dat lea cahkiidan min vuostái, dasgo min áhčit eai leat doahttalan dán girjji sániid eaige leat dahkan buot mii lea čállojuvvon dasa min várás.”

₁₄Dalle báhppa Hilkia, Ahikam, Akbor, Šafan ja Asaja vulge gullat Hulda, profehtanissona, gean boadnjá lei bivttaslanja fuolaheaddji Šallum, Harhasa bártni Tikva bárdni. Profehta ásai Jerusalema ođđa gávpotoasis. Go sii ledje muitalan áššiset sutnje, ₁₅de son dajai sidjiide: “Ná cealká Hearrá, Israela Ipmil: Muitalehket dan olbmái gii vuolggahii din mu lusa, ₁₆dán Hearrá sáni: ‘Mun divttán lihkuhisvuođa deaividit dán báikki ja dan ássiid, aiddo nugo daddjojuvvo dan girjjis maid Juda gonagas dál lea lohkan. ₁₇Sii leat hilgon mu ja cahkkehan oaffardola eará ipmiliidda ja moaráhuhttán mu gieđaideaset daguiguin. Mu moarri lea cahkiidan dán báikki vuostá iige čáskka.’ ₁₈Muhto go Juda gonagas lea vuolggahan din jearrat Hearrá dáhtu, de dadjet sutnje: Ná cealká Hearrá, Israela Ipmil: ‘Don leat gullan mu sániid, ₁₉ja du váibmu lea njuorranan. Don leat vuolidan iežat Hearrá ovddas go gullet maid mun lean sárdnon dán báikki ja dan ássiid vuostá. Don leat gaikkodan biktasiiddát ja čirron mu muođuid ovddas go gullet, mo dát báiki oktan ássiidisguin heavahuvvo ja šaddá hirbman ja garrusátnin. Danin munge gulan du, cealká Hearrá. ₂₀Mun čohkken du áhčiidat lusa, ja don beasat hávdái ráfis. Don it dárbbaš oaidnit lihkuhisvuođa man mun divttán deaividit dán báikki.’” Dán vástádusa sii bukte gonagassii.