David ja Abigajil
1Samuel jámii, ja oppa Israel čoagganii čierrut su. Son hávdáduvvui ruovttubáikásis Ramai.
Dasto David lei manai Paranmeahccái. 2Maonis ásai muhtun olmmái geas ledje oapmeealut Karmelis. Son lei hui rikkis; sus ledje golbmaduhát sávzza ja duhát gáicca. Son lei dál beaskideamen sávzzaidis Karmelis. 3Olbmá namma lei Nabal, ja su áhkká lei Abigajil. Abigajil lei jierbmás ja fávrros nisu, muhto olmmái gii gulai Kaleba sohkii, lei roavis ja bahá. 4Go David oaččui gullat meahcis ahte Nabal lei beaskideamen sávzzaidis, 5de son vuolggahii logi nuorra olbmá mátkái ja dajai sidjiide: “Mannet Karmelii Nabala lusa. Celket sutnje dearvvuođaid mus 6ja dadjet: Mun sávan lihku ja buori dutnje ja du bearrašii ja buot dasa mii dus lea. 7Mun lean gullan ahte don leat dál beaskidahttimin sávzzaid. Du guođoheaddjit leat leamaš ovttas minguin, muhto mii eat leat muosehuhttán sin iige sis leat láhppon mihkkege oppa dan áiggis go sii leat leamaš Karmelis. 8Jeara olbmáinat, siinai sáhttet muitalit dan dutnje. Danin mun bivddán du váldit bures vuostá mu olbmáid, siihan leat boahtán ávvubeaivvi. Atte bárdnásat Davidii ja bálvaleddjiidasat mii dus fal liigu.”
9Go Davida olbmát bohte Nabala lusa, de sii celke dearvvuođaid Davidis ja báhce vuordit vástádusa. 10Muhto Nabal jearai: “Gii lea David, gii Isaja bárdni? Dáláš áiggiid nu eatnat šlávat leat báhtaran iežaset isidiin. 11Válddášingo mun iežan láibbi ja čázi ja omiid maid lean njuovvan beaskideddjiidasan, ja attášin olbmuide geat bohtet dieđe gos?” 12Olbmát jorggihedje, máhcce Davida lusa ja muitaledje buot maid Nabal lei dadjan. 13David dajai olbmáidasas: “Čatnet miehki boahkánii, juohke olmmái!” Sii dahke nu, ja maiddái David čanai miehki boahkánii. Sullii njeallječuođi olbmá vulge Davidiin Karmelii, dan botta go guoktečuođi olbmá báhce orrut gálvvuid luhtte.
14Muhtun bálvaleaddji muitalii Abigajilii, Nabala áhkkái: “David vuolggahii áirasiid deike meahcis dearvvahit min isida, muhto son dušše belkkii sin. 15Almmatge dat olbmát leat leamaš hui ustitlaččat midjiide, sii eai leat muosehuhttán min iige mis leat láhppon mihkkege dan áiggis go mii leat leamaš singuin seammá guovlluin. 16Sii leat leamaš min birra muvran ijatbeaivái oppa dan áiggi maid mii guođoheimmet smávvaomiid sin lahkosiin. 17Smiehta dal dárkilit maid sáhtát dahkat! Duopmu lea vissásii mearriduvvon min isidii ja buot su olbmuide. Son ieš lea nu suohpáheapme ahte suinna ii ábut sárdnut.” 18Abigajil čohkkii hoahpus guoktečuođi láibbi, guokte viidneseahka, vihtta sávzzagoruda, vihtta seamihtu bassojuvvon gortniid, čuođi rusingáhku ja guoktečuođi fiikongáhku, ja daid son noađuhii áseniid čielgái. 19De son dajai bálvaleddjiidasas: “Mannet mu ovdal, mun boađán dakka din maŋis!” Muhto isidasas Nabalii son ii jietnadan maidege. 20Go son lei riidemin áseniin váris vuolás, de bođii David olbmáidisguin fáhkka su njeaiga. 21David lei jurddašan: “Mun lean duššás várjalan dán olbmá opmodaga meahcis, nu ahte das ii leat láhppon mihkkege. Son lea mávssahan buori baháin. 22Ipmil ráŋggáštehkos mu dál ja álo, jos mun divttán ovttage su olbmáin eallit ihttiđida rádjái!”
23Go Abigajil oinnii Davida, de son njiejai hoahpus ásena čielggis, gopmirdii eatnamii muođuid ja dearvvahii su gudnejahttimiin. 24Son luoitádii Davida julggiid ovdii ja dajai: “Visot lea mu sivva, hearrá! Divtte dattetge iežat bálvaleaddjinissona sárdnut dutnje, ja guldal mii mus lea dadjat. 25Ale beroš dan suohpáhis Nabalis, hearrá! Makkár namma, dakkár olmmái. Nabal lea su namma, ja jallavuohta sus leage. Mun, du bálvaleaddjinisson, in oppa oaidnánge daid olbmáid geaid ledjet vuolggahan, 26muhto nu duohta go Hearrá eallá, ja nu duohta go don ieš ealát, hearrá, de Hearrá lea hehtten du geassimis varravealggi badjelasat ja veahkeheames ieš iežat. Vare du vašálaččaide ja daidda geat dáhttot dutnje bahá, geavašii dego Nabalii! 27Váldde vuostá dán attáldaga maid du bálvaleaddjinisson lea buktán dutnje, hearrá, ja atte dan daidda olbmáide geat leat duinna du mátkkiin. 28Atte ándagassii iežat bálvaleaddjinissona rihkkuma! Hearrá áigu ráhkadit dutnje bissovaš viesu, danin go don soađat Hearrá sođiid, itge don šatta sivalažžan vearrivuhtii nu guhká go ealát. 29Jos muhtun doarrida du ja áigu goddit du, de Hearrá, du Ipmil, suodjala du heakka dego divrras geađggi, muhto du vašálaččaid heakka son bidjá šleŋgui ja šleŋge eret. 30Go Hearrá dahká dutnje buot buori maid lea lohpidan, ja bidjá du Israela ráđđejeaddjin, 31de don, hearrá, it dárbbaš cuiggodit iežat itge dovdat bahča miela danin go livččet golggahan vigihis vara ja veahkehan ieš iežat. Muhto go Hearrá dahká dutnje buori, de muitte iežat bálvaleaddjinissona, hearrá!” 32David dajai Abigajilii: “Máidnojuvvon lehkos Hearrá, Israela Ipmil, gii vuolggahii du mu ovddal! 33Buressivdniduvvon lehkos du jierpmálašvuohta, ja buressivdniduvvon don ieš gii odne leat hehtten mu geassimis varravealggi badjelasan ja veahkeheames ieš iežan! 34Muhto nu duohta go Hearrá, Israela Ipmil, eallá, son gii lea hehtten mu dahkamis dutnje baháid: Jos don it livčče boahtán hoahpus mu ovddal, de ihttin čuvggodeapmái Nabalii ii livčče báhcán oktage olmmái!” 35De David válddii maid Abigajil lei buktán, ja dajai: “Máhca ruktosat ráfis! Mun lean guldalan du ja dagan nugo don bivdet.”
36Go Abigajil bođii ruoktot, de Nabal lei doallamin guossemállásiid mat livčče dohkken gonagassii. Nabal lei hui arvvot ja sakka gárremiin, danin Abigajil ii muitalan sutnje maidege ovdal iđida. 37Muhto iđđedis go Nabal lei čielgan, de Abigajil muitalii sutnje dáid fearaniid. Dalle Nabala váibmu stirddui, ja son njaŋgasii dego geađgi. 38Sullii logi beaivvi geažes Hearrá časkkii Nabala, ja son jámii.
39Go David gulai ahte Nabal lei jápmán, de son dajai: “Máidnojuvvon lehkos Hearrá! Son ráŋggáštii Nabala dan hiddjádusa geažil maid mun šadden gillát. Hearrá hehttii mu dahkamis bahá ja divttii Nabala bahávuođa boahtit su iežas oaivái.”
De David vuolggahii áirasiid bivdit Abigajila áhkkánis. 40Davida bálvaleaddjit bohte Abigajila lusa Karmelii ja dadje: “David vuolggahii min deike viežžat du su áhkkán.” 41Dalle Abigajil gopmirdii eatnamii muođuid ja dajai: “Mun lean su bálvaleaddjinisson; suova mu šaddat su šlávvanissonin gii basan hearrán bálvaleddjiid julggiid.” 42De Abigajil ráhkkanii hoahpus mátkái, čohkkedii ásena čielgái ja vulggii oktan viđain bálvaleaddjinissoniin Davida áirasiid mielde, ja son šattai Davida áhkkán.
43David lei váldán áhkkán maiddái jisreellaš Ahinoama, nu ahte sus ledje dál guokte áhká. 44Muhto Saul lei addán nieiddas Mikala, Davida vuosttaš áhká, gallimlaš Paltii, Lajiša bárdnái.
