Dan beaivvi golggiida ája mii buhtista Davida viesu ja Jerusalema ássiid suttus ja buhtismeahttunvuođas.
Dan beaivvi, cealká Hearrá, Almmiveagaid Ipmil, mun heavahan eatnamis eahpeipmiliid, iige oktage šat namat daid. Maiddái vearriprofehtaid ja buhtismeahttunvuođa vuoiŋŋa mun jávkadan eatnamis. Jos muhtun ain profehtastallá, de su iežas áhčči ja eadni dadjaba sutnje: “Don it oaččo eallit, dasgo don leat sárdnon giellásiid Hearrá nammii.” Su iežas áhčči ja eadni geat sahkanahtiiga su, čuggeba su jámas go son lea profehtastallamin. Dan beaivvi juohke profehta heahpana oainnáhusaidis dihte iige šat gárvot guolgabiktasa, amas dovdojuvvot. Son cealká: “Mun in leat profehta, mun lean eananbargi. Nuorravuođa rájes mun lean bargan eatnama.” Jos muhtun jearrá sus: “Mat háviid dus leat rattis?” de son vástida: “Mun ožžon daid ustibiiddán viesus.”
Buhtistuvvon bázahas
Miehkki, loktan mu báimmana vuostá,
iežan lagamuš olbmá vuostá!
cealká Hearrá, Almmiveagaid Ipmil.
Mun časkkán báimmana, ja sávzzat bieđganit,
mun bajidan gieđa unnimusaid vuostá.
Oppa eatnamis, cealká Hearrá,
guokte goalmmádasa
duššaduvvojit ja jápmet,
muhto okta goalmmádas báhcá.
Dan goalmmádasa mun doalvvun
dola čađa,
mun buhtistan dan dego silbba
ja geahččalan dan nugo golli geahččaluvvo.
Sii rávket mu nama,
ja mun vástidan sidjiide.
Mun cealkkán: “Sii leat mu álbmot,”
ja sii vástidit: “Hearrá lea min Ipmil.”
(c) Det Norske Bibelselskap, Suomen Pipliaseura, Svenska Bibelsällskapet 2019
(c) Norwegian Bible Society, Finnish Bible Society, Swedish Bible Society 2019
