Vare don livččet mu viellja,
gean mu eadni lea njamahan!
Dalle mun cummistivččen du
go deaivvadetne olgun,
iige oktage badjelgeahčaše mu dan dihte.
Mun válddášin du eadnán vissui,
su lusa gii riegádahtii mu.
Mun njorrešin dutnje máisttaviinni
ja granáhtaehpeliiddán sáhpi.
Su gurut giehta lea mu oaivvi vuolde,
su olgeš giehta fátmmasta mu.
Mun vuortnuhan din,
Jerusalema nieiddat:
Allet bovtte ráhkisvuođa,
allet muosehuhte dan ovdal go
dat ieš hálida!
Earát
Gii lea duot gii boahtá meahcis
ja mieigá iežas ráhkkásii?
Moarsi
Mun bokten du ehpelmuora vuolde,
doppe gos du eadni sahkanahtii du,
gos du riegádahtti sahkanahtii du.
Bija mu seailan váibmot vuostá,
bija seailan iežat giehtaruohttasa birra.
Ráhkisvuohta lea gievra nugo jápmin,
hálidus sodjameahttun
dego jábmiidáibmu.
Dat buollá dego dolla,
nugo fámolaš dollanjuokčamat.
Stuorra čázit eai sáhte
čáskadit ráhkisvuođa,
eanut eai veaje dan heavahit.
Jos muhtun attášii buot maid eaiggáduššá
vai vuoitá ráhkisvuođa,
de gii badjelgeahčašii su?
Earát
Mis lea uhca oappáš
geas eai leat velá čiččit.
Maid mii dahkat oabbáseamet
dan beaivvi go irggit bohtet?
Jos son livččii muvra,
de mii nannešeimmet dan silbahárjjiin.
Jos son livččii uksa, de mii dahpašeimmet
dan sederfielluin.
Moarsi
Mun lean muvra,
ja mu čiččit leat dego toartnat.
Muhto go son boahtá, de mun vuollánan.
Irgi
Salomos lei viidnegárdi
Baal Hamonis.
Son attii dan gáhttejeaddji háldui
gii galggai máksit šattus
duhát šekela silba.
Muhto mu viidnegárdi lea dás.
Doala duháhiiddát, Salomo,
ja atte vel guoktečuođi gáhttejeaddjái!
Don gii orut gilvvagárddis,
ustibat dáhttot gullat du jiena,
divtte mu gullat du dadjamin:
Moarsi
“Doama, mu ráhkis,
dego gasella dahje nuorra sarvva
njálggahájat váriide!”
