Koarrajođiheaddjái. “Gittita” mielde. Davida sálbma.
Hearrá, min Ipmil, man veagalaš
du namma lea eatnama alde,
don leat lebben hearvásvuođat albmái!
Uhcahaččaid
ja njammimánáid njálmmis
don leat vuođđudan alccesat
suoji vašálaččaidat vuostá,
vai beasat bissehit juohke vuostálasti
ja mávssaheaddji.
Go mun oainnán du almmi
maid du suorpmat leat dahkan,
mánu ja násttiid
maid don leat ráhkadan,
de mii dalle lea olmmoš,
go don muittát su,
olbmománná,
go don anát sus fuola?
Don dahket su goasii Ipmila
láhkásažžan,
kruvnnidit su hearvásvuođain
ja gudniin.
Don diktet su ráđđet
gieđaidat daguid,
bidjet buot su julggiid vuollái:
Sávzzaid ja vuovssáid, buot omiid,
velá meahci spiriidge,
almmi lottiid ja meara guliid,
buot mat johtet meara bálgáid.
Hearrá, min Ipmil,
man veagalaš du namma lea
oppa eatnamis!
Your browser does not support HTML5 audio.
