Sálmmaid girji 2

₁Manne álbmogat stuibmidit,

manne čearddat hutket duššálaččaid?

₂Eatnama gonagasat čuožžilit,

ráđđejeaddjit ráđđádallet

gaskaneaset

Hearrá ja su vuidojuvvon

gonagasa vuostá:

₃“Botkejehkot sin láhkkiid

ja bálkestehkot sin čatnasiid!”

₄Son gii ráđđe almmis, boagusta,

Hearrá bilkida sin.

₅Son sárdnu sidjiide vašis,

son suorggaha sin buolli moaristis:

₆“Mun lean ásahan iežan gonagasa

Sionii, bassi várrásan.”

₇Mun almmuhan

maid Hearrá lea mearridan.

Son celkkii munnje:

“Don leat mu bárdni,

odne mun riegádahtten du.

₈Ánut mus, de mun attán dutnje

álbmogiid árbin

ja oppa eatnama opmodahkan.

₉Don cuvket álbmogiid

ruovdesoppiin

ja mollet daid dego láirálihtiid.”

₁₀Meannudehket viisásit,

gonagasat,

váldet vuostá rávvagiid,

eatnama ráđđejeaddjit!

₁₁Bálvalehket Hearrá baluin,

rámidehket su doarggistemiin!

₁₂Cummistehket bártni,

vai son ii moaráhuva

ja vai dii ehpet dušša,

dasgo su moarri cahkkana fargga.

Ávdugasat dat geat

dorvvastit sutnje.